ஆடவர் உலகக் கிண்ண றக்பியில் முதலாவது பெண் மத்தியஸ்தர்

பிரான்ஸில் இந்த வருடம் நடைபெறவுள்ள ஆடவர் உலகக் கிண்ண றக்பி போட்டிக்கான மத்தியஸ்தர்  குழுவில் பெயரிடப்பட்டுள்ள முதலாவது பெண் என்ற வரலாற்றுச் சாதனையை ஜோய் நெவில் படைத்துள்ளார்.

அயர்லாந்தின் முன்னாள் வீராங்கனையும் ஆறு நாடுகள் க்ராண்ட் ஸ்லாம் வெற்றியாளருமான ஜோய் நெவில் (39 வயது), ஆடவர் உலகக் கிண்ண றக்பி போட்டியில் தொலைக்காட்சி மத்தியஸ்தராக பெயரிடப்பட்டுள்ளார்.

அயர்லாந்து மகளிர் அணியில் 2003 இலிருந்து 2013 வரை இடம்பெற்ற ஜோய் நெவில் 2006, 2010 ஆகிய இரண்டு அடுத்தடுத்த மகளிர் உலகக் கிண்ண றக்பி அத்தியாயங்களில் விளையாடியிருந்தார்.

2009இல் அயர்லாந்து மகளிர் றக்பி அணித் தலைவராக விளையாடிய அவர், 2013இல் க்ராண்ட் ஸலாம் சம்பியன் அணியிலும் விளையாடியிருந்தார்.

றக்பி விளையாட்டிலிருந்து ஓய்வுபெற்ற பின்னர் 2013இல் உள்ளூர் மத்தியஸ்தராக செயற்பட ஆரம்பித்த அவர், 2017இல் சர்வதேச மகளிர் றக்பி மத்திஸ்தரானார்.

இங்கிலாந்துக்கும் நியூஸிலாந்துக்கும் இடையில் 2017இல் நடைபெற்ற மகளிர் உலகக் கிண்ண றக்பி இறுதிப் போட்டியில் மத்தியஸ்தம் வகித்த  ஜோய்  நெவில், இப்போது ஆடவர் உலகக் கிண்ண றக்பி போட்டியில் முதல் தடவையாக மத்தியஸ்தர் குழாத்தில் இடம்பெறுகிறார்.

இதேவேளை, பிரான்ஸ் 2023 ஆடவர் உலகக் கிண்ண றக்பி போட்டியை முன்னிட்டு  12 பிரதான மத்தியஸ்தர்கள், 7 உதவி மத்தியஸ்தர்கள், 7 தொலைக்காட்சி மத்தியஸ்தர்கள் பெயரிடப்பட்டுள்ளனர்.

ஆடவர் உலகக் கிண்ண றக்பி போட்டி 2023 செப்டெம்பர் 8ஆம் திகதிமுதல் அக்டோபர் 28ஆம் திகதிவரை நடைபெறவுள்ளது.

Leave a Reply

Your email address will not be published. Required fields are marked *